عدد الرسائل : 987 العمر : 33 الموقع : https://prince-love.ahlamontada.net/forum.htm الدول : المهنة : الهواية : المزاج : تاريخ التسجيل : 24/08/2008
موضوع: مقابله مع مدمن مخدرات (live) الخميس أغسطس 28, 2008 10:41 am
شهدت الموافق 2-8-1429 هـ اليوم جامعه ام القرى تجربة لاول مرة تحصل وهي عمل مقابلة مع (حالة) مباشرة وكان في استضافه الحالة الدكتور خالد برقاوي
بدأت المحاضره تمام الساعه 12 ظهر اليوم في جامعه ام القرى في الاول طلب الدكتور خالد الهدوء من كل الحاضرات عشان الكل يستفيد
الحالة رجل يبلغ من العمر 42 سنة يدعى (ع.م) بدء كلامه بالصلاه على النبي عليه افضل الصلاه والسلام كان في عمر الـ 13ــ اول ما جرب الدخان وكان الدخان اول طريق للادمان وزي ما نقول بالعامي (شي يجر شي) كما جاء على لسانه انه كان مدلل والسبب الرئيسي تقريبا في ظهور المشكلة الدلال
يقول مره واحد من اصحابه شله السوء طبعا قله ليش ماتجرب شي تاني غير الدخان جرب الكاس هادا وراح تتبسط وتفلها الكلام هادا حصل سنة 1402هـ وكان وقتها تالت متوسط وجرب الكاس وكاس ورا كاس وشوية حشيش وبدء يتعمق في هادا الطريق آخر شي بدء في استخدام الهيروين وزي ماقال ان الهيروين دمر الجزء الباقي اللي ما اتدمر فيه واهله حاولوا معاه كتير وكان يقولهم ما بضر الا نفسي فـ مالكم دخل فيا
قرر اخوه الكبير اللي بيحضر دكتوراة في امريكا انه ياخده معاه يكمل دراسة هناك ويتعالج قبل السفر بفترة بسيطة هرب من البيت عشان مايبغى يسافر يبغى يقعد على حالته هادي حاليا وهوا بيتكلم دمع وقال 27 سنة اكيد لو رحت ورجعت كان زماني دحين معايا شهاده وزماني صرت شي كبير..
كمل كلامه وهوا مدمن وكلنا ساكتين ومتأثرين اتكلم عن معاناته مع اهله يقول ان المدمن منبوذ من البيت ومنبوذ كمان من الشارع كان همه تلاته اشياء فقط
يقول انا كنت ميت لاني ماكنت اذكر الله ولا كنت اصلي ولا كنت حافظ شي من القرآن كنت اسمع برمضان بس ماعرف الصوم نايم طول النهار صاحي طول الليل اتعاطى مواد مخدره كنت مروج ومدمن في نفس الوقت .. الناس بعد العشا يروحوا يصلوا التراويح وانا ادخل حمامات المسجد عشان اتعاطى المخدر جملة قالها مرة حزنتني
(تسمعوا بتشجيع السياحه الداخليه قلنا ايوا قال انا كنت اشجعها تعرفوا كيف قلنا كيف قال في كل مرة في سجن غير مرة سجن جده مرة سجن الرياض ..الخ)
يقول تعبت اهلي معايا اخوني نبذوني وامي وابويا الله يرحمهم تعبوا معايا الكل قاطعه لانه كان نموذج سيئ عن عيلته واهله لدرجه اخوه قله ان ماتخاف على نفسك خاف على بناتنا مين بيتزوجهم وخالهم مدمن
يقول كنت انضرب من الشرطة واتهان واي شي بس ولا كان يهمني كل همني متى يفكوني اروح اشتري اللي ابغاه الين يوم اتعاطى ابره في رجله!!! وجات في مكان غلط ورجله اتورمت وصار عنده جلطه وكانت راح تتبتر رجله
يقول.. كانت رجلي زي المسند ماكنت اقدر اتحرك ولا امشي وطلب يروح مستشفى الامل في جده وراح والحمد لله شوية شوية بدء يخف لانه بدء يراجع نفسه قال خليني اجرب اتعافى واشوف يقولو المخدرات تبسط خليني اشوف الحياه كده تبسط ولا لا وبدء كل من في المستشفى بدعمه وتشجيعه من الطبيب للمعالج النفسي للاخصائي الاجتماعي
لحد ماصار نموذج للمدمن التائب وبدء يحضر حلقات ذكر ويروح المسجد ودخل تحفيظ قرآن شوية شوية شوية شوية ماشاء الله عليه تاب وصار دحين بيلقي محاضرات في السجون والمساجد والمدارس
وحاليا هوا متزوج وعنده بنت وولد ويدعي ربه يطلعوا ناس كويسيين بدأنا نسأله بعد ما اتكلم ....
هل في المستشفى فعلا بيعطوا جرعات بسيطة مخدره شوية شوية يقللوها لحد ما يبطلوا يعطوها للمدمن عشان يبداو يعالجوه وحده وحده وهل في غرف عزل
نفنى انه في احد ياخد جرعات في المستشفى لان حتى الدخان ممنوع فيها بس توجد غرف عزل للناس اللي مرة يتشجنوا وكده يحطوهم فيها لحد مايهدوا ويرجعوهم غرفهم
كمان سألناه ايش اكتر موقف ماراح ينساه هنا قعد يبكي شوية واخد وقت على ماجاوب قال انه حضر قصاص لمروج مخدرات وبعد ماحضر القصاص سأل بعض الاولاد هادا واحد ومات تتوقعوا كم مدمن مات بعد ما اشترى منه قالوا كتير طيب كم مدمن طلق زوجتة قالوا كتير قال يعني هادا الشخص قتل ناس مرة كتير .. الموقف اللي ماراح انساه انه امي كانت تدعي عليا اخر ماتعبت ان شاء الله تروح ولا ترجع وتدعي دعاوي مرة توجع له قلبه للان وخايف من هادي الدعاوي حاليا
وكمان سألناه هل واجهتك صعوبة في العثور على زوجتك او على بنت ترضى بيك
ضحك وقال اهل زوجتي وزوجتي مايدروا عني لاني تركت الادمان من 6 سنين وماله داعي انهم يعرفوا دحين اعتقد هالشي له سلبيات اكتر من الايجابيات وان زوجتي عرفت هيه زوجة عاقلة اتوقع تتقبل اني كنت مدمن زمان والحمد لله دحين تبت ورجعت الى الله .........
تقريبا هادا المخلص للمحاضره معليش لو طويل او لو في اشياء ناقصه او ماقلتها حاولت اركز على النقاط الواضحه يمكن لو احد قري هادا الكلام يأثر فيه بطريقة او بتانية او سبحان الله شباب يكونوا في بدايه هادا الطريق ويفكروا بعد دا الكلام
اخر شي اقول الله يثبتة يارب ويفرح بعياله وربي يغفر له ويغفر لنا ولكل شباب وبنات المسلمين والله يهدينا ويبعد عننا كل شر
![..•₪•[الإدارهـ ]•₪•..](https://i.servimg.com/u/f53/12/63/37/22/15891511.gif "..•₪•[الإدارهـ ]•₪•..")
الخميس أغسطس 28, 2008 10:41 am
